කුමන ජාතික වනෝද්‍යානය

ශ්‍රී ලංකාවේ පක්ෂීන් ඉතා විශාල වශයෙන් ගැවසෙන ප්‍රදේශ අතරින් “ කුමන ” ප්‍රදේශය වඩාත් කැපී පෙනෙන ප්‍රදේශයකි. කුමන ජාතික වනෝද්‍යානයෙන් කුරුළු විශේෂ 255 ක් පමණ හඳුනාගෙන ඇත. මෙහි බහුලව වාසය කරන පක්ෂීන් සඳහා කලපු සහ වැව් 20 කින් පමණ පාරිසරික සහයක් ලැබේ. කුමන ජාතික වනෝද්‍යානයේ දකුණු මායිම සෑදී ඇත්තේ, කුඹුක්කන් ඔය මඟිනි. මේ අවට කලපු වල ඇත්තේ මීටර් දෙකකට (අඩි 6.6) අඩු ගැඹුරකි. මුහුදු ජලය වරින් වර කුමන විල්ලුවට පිටාර ගලනු ලබයි. මෙම කලාපය මුහුදු මට්ටමේ සිට මීටර් 90 ක් උසින් (අඩි 300) පිහිටා ඇත. මෙම කලාපයේ වාර්ෂික වර්ෂාපතනය මිලිමීටර් 1,300 (අඟල් 51.18) ක් වන අතර සාමාන්‍ය වාර්ෂික උෂ්ණත්වය 27.30 °C (81.14 °F) ක් වේ.

ක්‍රිස්තු පූර්ව තුන්වන සියවස දක්වා දිවෙන ප්‍රාග් ඓතිහාසික ශිෂ්ටාචාරයක් මෙම ප්‍රදේශයේ පවතී. මීට අමතරව, මෙම ප්‍රදේශයෙන් ක්‍රිස්තු පූර්ව 2 වන සහ 1 වන සියවස්වල සෙල්ලිපි සොයා ගැනීමට හැකි වී ඇත. වාර්ෂිකව පවත්වන කතරගම හින්දු කෝවිලේ පාද වන්දනාව ද කුමන ජාතික වනෝද්‍යානය හරහා ගමන් කරයි. මෙම වන්දනාව සඳහා දෙමළ සහ සිංහල යන දෙපිරිසම සහභාගි වෙති. මෑත කාලීනව කුමන ජාතික වනෝද්‍යානයේ දී දැක ගත හැකි වන්නේ අඩු පක්ෂීන් ගහණයකි. මෙයට හේතුව වී ඇත්තේ විවිධ මානව ක්‍රියාකාරම් ය.

ඔබට මෙම වනෝද්‍යානයට ඇතුළු විය හැක්කේ ඕකන්ද උද්‍යාන කාර්යාලයෙන් බලපත්‍රයක් සහ මාර්ගෝපදේශයන් ලබා ගැනීමෙන් අනතුරුව යි.