Raid Amazones ත්‍රාසජනක වැඩසටහන පැවැත්වීමට ශ්‍රී ලංකාව තෝරා ගැනීමෙන් ශ්‍රී ලංකාව ආරක්ෂිත ගමනාන්තයක් බවට ලෝකයට ධනාත්මක පණිවිඩයක් කියාපාන බව සංචාරක අමාත්‍ය ප්‍රසන්න රණතුංග මහතා පැවසීය. අමාත්‍යවරයා මේ බව සඳහන් කළේ පසුගිය මාර්තු 16 වැනිදා සීගිරියේ දී ආරම්භ වූ Raid Amazones ත්‍රාසජනක වැඩසටහනේ සමාරම්භක අවස්ථාවට සහභාගි වෙමිනි. Covid-19 වසංගතයෙන් පසු මෙරට සිදු වූ විශාලතම සංචාරක ඉසව්ව වන Raid Amazones ත්‍රාසජනක ඉසව්වට ක්‍රීඩක ක්‍රීඩිකාවන් 600කට අධික පිරිසක් සහභාගි වෙති.

කවුඩුල්ල, මැදිරිගිරිය, වෑවල, කණ්ඩලම, සීගිරිය සහ මහ විල්ගමුව යන ප්‍රදේශවල තරගාවලිය පැවැත්වේ. පළමු අදියර මාර්තු 14 සිට මාර්තු 22 දක්වා තරඟකරුවන් 253 ක් සහ කාර්ය මණ්ඩලය 63 දෙනෙකුගෙන් සමන්විත වන අතර දෙවන අදියර මාර්තු 28 සිට අප්‍රේල් 6 දක්වා තරඟකරුවන් 216 දෙනෙකුගෙන් හා කාර්ය මණ්ඩල සාමාජිකයින් 63 දෙනෙකුගෙන් සමන්විත වේ. කාර්ය මණ්ඩලයට වෛද්‍යවරුන් හය දෙනෙක්, ගලවා ගැනීමේ සහායකයින්, පිහිනන්නන්, ඡායාරූප ශිල්පීන් සහ වීඩියෝ ශිල්පීන් ඇතුළත් වේ.

ප්‍රංශයේ ආරම්භ වූ ජනප්‍රිය වාර්ෂික වික්‍රමාන්විත ක්‍රීඩා තරඟයක් ලෙස, මෙම තරඟාවලියට දිවීම, ඔරු පැදීම, මවුන්ටන් බයිසිකල් පැදීම, සිතියම්ගත කිරීම සහ මාලිමා ආධාරයෙන් හිම මත ලිස්සා යාම සහ දුනු ශිල්පය වැනි තරඟ ඇතුළත් වේ. ශ්‍රී ලංකන් ගුවන් සේවය මෙම වසරේ තරඟාවලියේ සත්කාරක ගුවන් සේවය වන අතර තේමා නිරූපකය වන්නේ සීගිරියයි. විශේෂයෙන්ම මෙම උත්සවය සඳහා ඔවුන් විසින් විශේෂ නිල ඇඳුමක් නිර්මාණය කර ඇත්තේ සීගිරි බලකොටුවේ සුවිශේෂි ලක්ෂණ ඉස්මතු කරමිනි. තරගාවලියට සහභාගි වීම සඳහා විදේශීය තරඟකාරිනියන් ශ්‍රී ලංකාවට ගෙන්වා ගැනීම සඳහා ශ්‍රී ලංකන් ගුවන් සමාගම විශේෂ ගුවන් යානයක් ද සුදානම් කර තිබිණි.